Ein Cae’r Ddôl: Gwylia’r blodau’n tyfu!

Mae’r gwanwyn yn yr awyr ac mae grŵp cymunedol newydd yn Llanberis, Cyfeillion Cae’r Ddôl, wedi sicrhau dyfarniad gan Grow Wild (a gefnogir gan y Gronfa Loteri Fawr ac a arweinir gan Erddi Botaneg Brenhinol, Kew) i feithrin dôl o flodau gwyllt brodorol ar lannau Llyn Padarn.

Bydd y prosiect yn helpu’r ardal o laswelltir yn Llanberis a elwir yn Gae’r Ddôl i flodeuo’n ddôl flodau gwyllt frodorol fywiog, lle gall ymwelwyr a phobl leol ddysgu, myfyrio ac ymlacio wedi’u hamgylchynu gan flodau.

Yn dilyn gostyngiad mewn pori, mae’r cae hwn yn dechrau dangos arwyddion o’r ddôl flodau gwyllt amrywiol a hardd y gallai ddod i fod. Mae Cyfeillion Cae’r Ddôl, grŵp o bobl leol sy’n cerdded drwy’r ardal hon yn rheolaidd, yn cynnig gweithio gyda Chyngor Gwynedd er mwyn sicrhau bod y blodau’n gallu ffynnu, a gweithio eu hud yn enwedig ar bobl ifanc sy’n cerdded drwy’r ardal, ond sydd efallai ddim yn edrych i lawr ar y blodau sy’n tyfu o’u cwmpas.

Bydd Cyfeillion Cae’r Ddôl yn gweithio mewn partneriaeth â pherchennog y tir, Cyngor Gwynedd. Drwy’r prosiect, a fydd yn rhedeg drwy haf 2016, bydd cyfleoedd i bobl leol ac ymwelwyr ddysgu am y planhigion o dan eu traed a’u meithrin drwy gelf, gwyddoniaeth a digwyddiadau cymdeithasol, yn ogystal â byrddau dehongli wedi’u dylunio gan artist lleol i helpu pobl i roi enw i’r blodau.

Dywedodd un o aelodau sefydlu Cyfeillion Cae’r Ddôl, y botanegydd proffesiynol, Robbie Blackhall-Miles “Rwyf mor falch bod hyn i gyd yn digwydd. Mae’r dolydd dŵr ym mhen draw Llyn Padarn yn arbennig iawn. Pan welais i’r tegeirianau gwyllt cyntaf yn tyfu yno, roeddwn i’n gwybod bod rhaid i rywun roi ychydig mwy o sylw iddyn nhw.”