Pam dylem ni garu Llyn Padarn?

P'un a oes gen ti fusnes ar lannau'r llyn, dy fod ti'n mwynhau nofio yn y lagwnau, dal pysgod, cerdded dy gi o amgylch llwybr y llyn, neu ddim ond yn gyrru heibio iddo bob dydd, mae gan bob un ohonom sy'n byw, yn gweithio neu'n treulio gwyliau yn nyffryn Llanberis gysylltiad â Llyn Padarn.

Yn 2009, dioddefodd y llyn oherwydd blodau algâu gwenwynig a olygai fod arwyddion rhybudd wedi cael eu gosod ar hyd glan y llyn yn cynghori pobl i osgoi defnyddio'r llyn am ran helaeth o'r haf. Cafodd y blodau eu hachosi gan gyfuniad o amodau tywydd a maetholion fel ffosfforws yn mynd i mewn i'r llyn. Gall y maetholion hyn ddod o nifer o ffynonellau gan gynnwys erydiad pridd a dŵr gwastraff. Mae'r maetholion yn bwydo'r blodau algâu a all fod yn wenwynig i bobl ac anifeiliaid os cânt eu llyncu. Mae algâu hefyd yn defnyddio'r ocsigen yn y dŵr sy'n ei gwneud hi'n anodd iawn i bysgod fyw yn y llyn.

Cafodd blodau 2009 effaith negyddol iawn ar fusnesau lleol, bywyd gwyllt, a phobl na allent fwynhau'r llyn mwyach. Heb leihau faint o faetholion sy'n mynd i mewn i'r llyn, mae'r bygythiad o ragor o flodau algâu yn parhau. Drwy wneud rhai newidiadau syml i'n gweithgareddau o ddydd i ddydd, gallwn helpu i leihau'r maetholion niweidiol sy'n mynd i mewn i Lyn Padarn.

Rhag ofn bod gen ti unrhyw amheuaeth pam y dylem garu ein llyn, cymer olwg ar y ffilm treigl amser syfrdanol hon o godiad haul dros Lyn Padarn wedi'i thynnu o Benllyn, Brynrefail. Wedi'i ffilmio gan Kevin Lewis, cafodd hon ei chipio fel treigl amser dros 4 awr gan ddechrau am 5yb.